O Obradoiro de Emprego “Valmiemprega II” promovido polos concellos de Baiona, Gondomar e Nigrán, e financiado pola Consellería de Economía, Emprego e Industria, é un proxecto de formación-emprego de nove meses de duración, no que se alterna a formación teórico práctica co traballo ou servizo nas distintas especialidades.
Desde a especialidade de “PROMOCIÓN TURÍSTICA LOCAL E INFORMACIÓN AO VISITANTE”, ofrecese aos centros educativos a organización de charlas didácticas e rutas guiadas para dar a coñecer os recursos da Comarca do Val Miñor, estas actividades serán realizadas polo alumnado-traballador do obradoiro e terán lugar entre os meses de marzo e abril. O proxecto enmárcase no ámbito territorial dos Municipios do Val Miñor, Baiona, Gondomar e Nigrán, coa denominación de “EXPLORANDO O VAL MIÑOR”.
As actividades están pensadas para escolares de primaria, ESO, Bacharelato e Ciclos Formativos, adaptando os contidos a cada unha das diferentes franxas de idade.
As “Charlas didácticas” acompañaranse con distintas actividades participativas, para que o contido sexa atractivo e didáctico ao mesmo tempo. A temática é sobre o territorio do Val Miñor, tocando os aspectos xeográficos e históricos, e amosando os recursos máis salientables do patrimonio histórico-artístico, cultural e natural. A duración aproximada estímase en 1 hora, tendo en conta a idade dos escolares.
Para escolares de idades entre 10 e 14 anos poderá escollerse entre dous temas:
- Natureza e actividades: centrado nos recursos naturais da comarca e as actividades que se fan nela como sendeirismo, actividades náuticas, etc… ou
- Os segredos do Val Miñor: centrado no noso patrimonio histórico artístico e na nosa cultura.
Para escolares de idades entre 6 e 9 anos o contido é unha mestura dos dous anteriores.
Para escolares a partir de 14 anos ó contido e “Aspectos xerais do Val Miñor”
As “Rutas Guiadas” a duración aproximada estímase en 2 horas, tendo en conta a idade dos escolares. Poderanse elixir entre as seguintes posibilidades que preparamos.
BAIONA
- RUTA 1: “EXPLORANDO MONTE BOI”
Percorrido de interpretación paisaxística dende A Palma seguindo polo paseo Monte Boi, onde descubriremos os segredos da fortaleza e da paisaxe da Baía.
- RUTA 2: “ UN PASEO MARIÑEIRO”
Percorrido comezando no paseo Pinzón, continuando polo Monumento “Encontro entre dous Mundos”, Paseo da Ribeira, Museo da Carabela e finalizando no Porto pesqueiro.
NIGRÁN
- RUTA 1: “EXPLORANDO ÁS DUNAS CHEGAMOS Á FOZ”
Percorrido dende Praia América á altura das Dunas de Gaifar ata Ramallosa pasando por Monte Lourido. Interpretando a paisaxe e os valores naturais coa flora e a fauna do lugar.
- RUTA 2: “REMONTANDO O RÍO MUÍÑOS”
Partindo de Praia América faremos o percorrido da Senda do Río Muíños. Contemplando a paisaxe de bosque de Ribeira e conectando o mar co interior.
GONDOMAR
- RUTA 1: “DE PONTE A PONTE”
Percorrido a carón do Río Miñor dende a Ponte das Ánimas ata a Ponte de Mañufe. Descubriremos o río Miñor, o punto de confluencia co río Zamáns e as características propias dun bosque de ribeira mesturado coa historia das nosas pontes.
- RUTA 2: “DESCUBRINDO OS SEGREDOS DA VILA DE GONDOMAR”
Percorrido polos arredores da vila visitando o Acueduto do Bravo, a Igrexa e contorna de San Bieito, a Ponte das Ánimas e finalizando no Parque da Coelleira na estatua da Galiña Azul.
Dende o Obradoiro Valmiemprega II, considérase que este tipo de actividades divulgativas do patrimonio contribúe a crear unha conciencia e respecto polo noso territorio dende as idades máis novas, por iso ofrécese esta interesante iniciativa, agardando que sexa do seu interese.
Máis información no tf: 986 384 020 ou a través do correo electrónico: oevalmiemprega2@gmail.com
