O Concello de Nigrán inicia por vez primeira na súa historia os trámites para obter o recoñecemento do selo ‘CAI’ (Cidade Amiga da Infancia) que concede o Fondo das Nacións Unidas para a Infancia (Unicef) de forma bienal. Ningún municipio galego logrouno e Nigrán traballa xa cara a este obxectivo co fin de obter o visto e prace na próxima convocatoria, cuxa resolución se coñecerá en outubro de 2016 e que implica catro anos de vixencia. Un dos primeiros pasos para a súa consecución arrinca este mesmo xoves coa celebración ás 12,00 horas no Auditorio Municipal do primeiro Pleno Infantil que reunirá ao alcalde e alumnos dos colexios públicos de Nigrán (CEIP Humberto Juanes, Mallón, Da Cruz e Carlos Casares) e o Centro de Educación Especial Juan María.
“Queremos deseñar e desenvolver políticas locais a favor da infancia de acordo cunha entidade tan respectada como Unicef, ao fin de contas trátase de facer partícipes a nenos e adolescentes da vida municipal, queremos darlles voz para que eles tamén teñan dereito a opinar e decidir. Sería un orgullo para Nigrán obter o selo CAI e, aínda que sabemos que é difícil, poñeremos todo o noso empeño en logralo porque, ademais, axudaría tamén a sensibilizar á poboación e a difundir a Convención dos Dereitos do Neno”, explica Juan González, alcalde de Nigrán.
O programa CAI foi creado por Unicef Comité Español en 2001 co propósito de promover a aplicación da Convención dos Dereitos do Neno (CDN) en pobos e cidades da xeografía nacional, forma parte á súa vez da Iniciativa Cidades Amigas da Infancia, liderada por Unicef Internacional desde o ano 2000 e no que colaboran gobernos nacionais, administracións locais, ONG…
Cada dous anos realízase unha convocatoria para que os concellos opten por vez primeira a obter o selo CAI ou o renoven (a vixencia é de catro anos). Actualmente en España obtivérono 115 concellos de 14 comunidades autónomas (ningún en Galicia). Entre os requisitos para poder optar a el figura a existencia dun órgano de participación infantil onde os nenos expresen as súas propostas e opinións aos responsables municipais, unha mesa de traballo para a coordinación interna da política local de infancia, accións a favor da infancia, informes de situación da infancia, plans de infancia a 3-4 anos vista… Unha serie de accións que o Concello de Nigrán iniciará de forma inmediata e que, nalgúns casos, xa arrincou, por exemplo a celebración do propio pleno infantil ou a construción de sendeiros peonís seguros cara aos colexios (caso do Humberto Juanes). “Queremos dar voz á infancia e á adolescencia desde todos os seus ángulos, non nos podemos esquecer dos nenos con familias en situación de vulnerabilidade ou con especiais dificultades físicas ou sensoriais”, engade González aludindo tamén ao proxecto “Un Nigrán para todos” que o Concello leva a cabo con alumnos do Centro de Educación Especial Juan María. “Trátase de construír un Nigrán amable onde todos sintamos orgullosos de vivir”, resume.
Pleno Infantil
O pleno infantil deste xoves seguirá o curso dun pleno ao uso pero os concelleiros serán nesta ocasión tres alumnos de sexto de primaria de cada centro educativo público de Nigrán (CEIP Humberto Juanes, Mallón, Dá Cruz, Carlos Casares) e o Centro de Educación Especial Juan María; de alcalde exercerá o propio rexedor, Juan González. Os compañeiros de clase serán o público. Cada portavoz de cada colexio expoñerá a súa visión sobre algúns dos dereitos da Convención dos Dereitos do Neno (Unicef facilitoulles manterial co que estiveron traballando en clase as últimas semanas) adaptándoos ao ámbito máis local e, finalmente, a sesión pecharase cos clásicos “Rogos e Preguntas” ao alcalde. Finalizará ás 13,30 horas.
