Un ano máis, e xa van dez, o concello da Guarda acollerá un acto adicado a homenaxear e recoñecer aos deportistas da vila e os éxitos que acadaron durante a pasada tempada. A X Gala do Deporte Guardés celebrarase o vindeiro venres 3 de marzo, ás 20’30 horas, no Centro Cultural da Guarda.
Neste evento, conducido polo presentador Terio Carrera, entregaranse diversos premios e recoñecementos a deportistas de distintas disciplinas polos títulos conseguidos e polas súas traxectorias, ademais de por en valor destacadas iniciativas deportivas.
Os máis de 20 galardóns que se entregarán nesta velada inclúen premios para os mellores deportistas individuais e para os mellores equipos; así como recoñecementos á mellor iniciativa deportiva, á promoción e dedicación ao deporte e á proposta innovadora.
Ademais, nesta décima gala o invitado que exercerá como padriño do evento será Vladimir “Vlado” Gudelj, ex xogador do Real Club Celta de Vigo.
Deste xeito, A Guarda e os seus deportistas prepáranse para vivir unha velada única o vindeiro 3 de marzo, á que se convida a tódolos veciños e veciñas a unha gala que estará adicada a por de relevo os logros dos deportistas e clubs guardeses, pero tamén ao ensalzamento dos valores que se transmiten co deporte como o compañeirismo, o esforzo, o traballo en equipo e o respecto aos demais.
