O Concello fai un especial chamamento aos locais de restauración, xa que ao beneficio para o medio ambiente e a comunidade, se sumaría a solución ao grave problema dos malos olores nos colectores
Nigrán solicitará á Deputación a súa participación no programa provincial de compostaxe comunitaria instalando unidades a tal efecto no punto limpo que permitirán aos usuarios depositar materia orgánica e recoller a cambio abono de alta calidade de xeito totalmente gratuito. Estos estarán á disposición dos veciños que se apunten e de locais de restauración, onde se xera gran cantidade de residuo idóneo, como sobras de comida, froitas e verduras, cascas de ovo, restos de café…
O Concello fai un especial chamamento aos hosteleiros para que se sumen ao proxecto, xa que ao indudable beneficio para o medio ambiente se sumaría a solución ao problema dos malos olores nos colectores que tantas queixas cidadás supoñen, especialmente no verán. “Colaboraremos con eles para que sexa un proceso que non lles supoña trastorno algún na súa actividade diaria e a cambio beneficie a todo o municipio, xa que se obtería maior compost e evitaría este problema”, explica Diego García Moreira, edil de Medio Ambiente (a previsión é que os composteiros entren en funcionamento no segundo trimestre de 2016, antes da época estival). “É un proxecto da Deputación moi rentable para Nigrán, xa que beneficiaría de xeito directo aos seus veciños ao tempo que se traballa a prol da economía sostible”, engade Juan González, alcalde do municipio.
Así, con este fin último de aposta clara pola reciclaxe no municipio e consecuentemente de mellora da calidade de vida dos veciños, o Concello anima a que os interesados no seu uso (particulares e hosteleiros) a que se inscriban dende este luns e ata o 8 de xaneiro, ben a través do mail info@nigran.org ou acudindo a Concellalía de Medio Ambiente (edificio antigo, segundo andar). Os datos que se deben aportar son nome e apelidos, idade, dirección, teléfono de contacto e o seu compromiso de participación.
“É un proceso sinxelo que ademáis ten unha vertente didáctica importante, posto que permite coñecer aos cidadáns a necesidade de separar e compostar os restos orgánicos producidos nos domicilios e ao mesmo tempo, se fortalecen os vínculos comunitarios entre veciños da zona, xa que todos participan no proceso”, sinala Diego García Moreira, edil de Medio Ambiente.
Ler mais: A Deputación fíxase como horizonte instalar 800 composteiros comunitarios na provincia este mandato
Mestres composteiros
Ademáis das unidades de tratamento biolóxico, a Deputación facilitará durante como mínimo 6 meses un mestre composteiro que terá a función tanto de dar soporte técnico como de participar activamente nos traballos físicos xunto cos veciños que se involucren, resolvendo as dúbidas e os problemas que poidan xurdir durante as fases do proceso.
Ademáis, formará na materia ao persoal ao cargo do Punto Limpo, que seguirá tratando os restos de poda (os residuos orgánicos que poden entregar os usuarios dos composteiros non inclúen esta madeira).
Precisamente, con vistas á instalación destas unidades de tratamento biolóxico e a través da Deputación, o edil de Medio Ambiente, Diego García Moreira, participou en setembro nun curso de verán sobre xestión de residuos que baixo o título “Hacia la economía circular’, organizou a Universidade Pública de Navarra.
