Esta mañá, tivo lugar en Madrid, na Secretaría de Estado de Turismo, o acto de presentación do programa “Europe Senior Tourism 2014-2015”, e posterior xornada de traballo entre destinos e comercializadoras para negociar os paquetes, concretando os detalles das aportacións incluidas en cada candidatura.
Ó acto e á xornada de traballo acudiron, en representación de Baiona, a concelleira de turismo, María Iglesias, e persoal técnico de turismo do Concello.
A candidatura de Baiona, foi incluída na proposta dunha das comercializadoras homologadas, en concreto a presentada por Euroseniors, que é a marca europea de Mundosenior, organizadora dos paquetes do Imserso en España.
Baiona é un dos 29 destinos nacionais homologados para participar neste proxecto.
Os mercados nos que está previsto que se comercialice Baiona son: Alemaña, Reino Unido, Francia e Suecia.
“Europe Senior Tourism 2014-2015”, é unha iniciativa da Secretaría de Estado de Turismo que xestiona SEGITTUR ( Sociedad Estatal para a Xestión da Innovación e as Tecnoloxías Turísticas), que consiste no deseño e organización dun sistema de viaxes destinados a cidadáns europeos de máis de 55 anos que viaxen a España en tempada media e baixa.
Este programa, que naceu pola necesidade de frear o problema da estacionalidade, xa atraiu a máis de 140.000 turistas, de 16 nacionalidades diferentes, en anteriores edicións.