Representantes de Povisa presentaron aos alcaldes de Baiona, Nigrán e Gondomar o servizo de hospitalización domiciliaria que a clínica privada concertada ofrecerá aos pacientes da comarca do Val Miñor a partir do próximo 15 de decembro e que estará plenamente operativo a finais de xaneiro de 2015.
O obxectivo das unidades de Hospitalización a Domicilio é ofrecer aos pacientes ingresados “unha alternativa” á hospitalización, de forma que poidan recibir atención sanitaria e tratamento nos seus propios domicilios.
A través deste servizo, os equipos sanitarios realizarán unha media de dúas ou tres visitas semanais para controlar os síntomas, administrar a medicación e tamén para procurar acompañamento psicolóxico aos pacientes, sinala a nota do Sergas.
O servizo está indicado para enfermos crónicos que requiren tratamentos hospitalarios ou coidados paliativos Para iso, un equipo composto por un médico e dúas enfermeiras da unidade de Hospitalización de Povisa en colaboración cos profesionais dos centros de saúde da área acudirán ás casas dos pacientes de luns a venres de 9,00 a 21,00 horas e os sábados de 9,00 15,00 horas.
Tal e como trasladou o Sergas, con este servizo “mellórase de forma importante a calidade asistencial ofertada”, posto que os usuarios poden acceder a prestacións sanitarias especializadas nos seus propios domicilios.
