A Concellaría de Medio Ambiente de Gondomar vén de deseñar unha serie de obradoiros dirixidos aos alumnos de Primaria, Secundaria e Bacharelato dos centros educativos de Gondomar. Estas actividades celebraranse ao longo dunha xornada de mañá en cada un dos centros e en diversos tramos das ribeiras do río Miñor. Están coordinados por un equipo de naturalistas e biólogos da empresa Estela, Loxística e Proxectos e divídense nas seguintes partes:
-Presentación do programa de educación para a sostibilidade no Concello de
Gondomar.
-Audiovisual sobre o sistema fluvial do Río Miñor en Gondomar. Xogos visuais e
auditivos protagonizados por diversos elementos da fauna e flora do río.
-Obradoiro cun mapa guía: obradoiro cun nivel de dificultade adaptado a cada unha
das idades dos alumnos/as.
Todas estas actividades virán acompañadas dunha visita guiada por algún dos tramos
do río Miñor cos alumnos dos diversos niveis de Primaria e Secundaria. O primeiro dos
obradoiros tivo lugar este luns 27 de abril, de mañá, no CEIP Serra-Vincios e o
percorrido realizouse polo río Zamáns, dada a súa proximidade. Ao longo destes
vindeiros días e semanas sumaranse a esta iniciativa os colexios públicos Chano
Piñeiro, Souto Donas e Neira Vilas, e os institutos Auga da Laxe e Terra de Turonio.