Dona Urraca e Pedro Madruga serán os protagonistas nas visitas teatralizadas ao castelo de Sobroso

a-deputacion-de-pontevedra-reabre-o-castelo-de-sobroso-coincidindo-coa-semana-santaA Deputación de Pontevedra porá en marcha a próxima fin de semana as anunciadas visitas teatralizadas ao Castelo de Sobroso que se desenvolverán o sábado 16 e o domingo 17, así como o venres 29 e o sábado 30 de xuño. Os días 16,17 e 30 de xuño a visita terá lugar ás 11,30 da mañá, mentres que o venres 29 será ás 5 da tarde.

O aforo é limitado para cada unha das visitas e o proceso de inscricións ábrese este martes na páxina web de Turismo Rías Baixas, www.turismoriasbaixas.com, a través dun apartado que estará dispoñible a partir das 11 da mañá. Aquelas persoas que desexen participar na iniciativa teñen tamén á súa disposición, para calquera dúbida ou información adicional, os teléfonos 886 211 700 e 618 320 033.

As visitas teatralizadas diríxense ao público familiar e van xirar arredor de dúas figuras con historia no Castelo: Dona Urraca, que estivo presa en Sobroso e fuxiu por un pasadizo, e Pedro Madruga, quen reconstruíu o Castelo despois das revoltas irmandiñas. O obxectivo é achegar, sobre todo aos máis novos e novas, a historia de Galicia dun xeito ameno e divertido, así como amosar a natureza e a paisaxe do Castelo de Sobroso podendo gozar dunhas incomparables vistas do val do Tea dende as terrazas da fortaleza.

Así mesmo, durante a visita teatralizada, as persoas participantes poden realizar tamén a senda ambiental “Senda do Bosque Atlántico”, unha proposta diferente posta en marcha para poder coñecer a historia do castelo e da súa natureza a través de códigos QR que os e as visitantes poden ir descargando no seu percorrido.

O Goberno provincial enmarca estas visitas teatralizadas dentro da estratexia de posta en valor do Castelo de Sobroso e dentro da campaña “Somos Historias” que dedica o mes de xuño ao patrimonio inmaterial. A Deputación continúa así no seu obxectivo de converter o Castelo de Sobroso noutro importante foco de atracción de visitantes, ao igual que o Castelo de Soutomaior, no que este tipo de actividade foi un absoluto éxito.

Ata o momento, a Deputación leva investido máis de 525.000 euros  na mellora da edificación e o acondicionamento do castelo de Sobroso, cuxos últimos traballos aínda visitaba o mes pasado a presidenta Carmela Silva e o alcalde de Ponteareas Xosé Represas. Estas últimas actuacións serviron para acondicionar, conservar e manter a edificación do castelo e nelas a institución provincial investiu 314.000 euros.

Please follow and like us:

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies