A Corporación Municipal de Baiona rende unha emotiva despedida a Ana Simons

A Corporación Municipal do Concello de Baiona despediu este xoves no pleno ordinario de setembro a súa concelleira de Urbanismo, Ana Simons, que deixou oficialmente o cargo polo seu cambio de residencia.

A concelleira de Urbanismo deixou oficialmente o seu cargo polo seu cambio de residencia

“Os cambios son a lei da vida e no Concello de Baiona tiven o mellor máster que xamais puiden facer, quero agradecer a todos as facilidades que tiven para traballar, tanto dos meus compañeiros como dos funcionarios, os concelleiros da oposición e os veciños, sería imposible enumerar un por un, pero se algunha vez falleivos pídovos mil e unha desculpas de todo corazón”, sinalou Ana Simons durante o seu emotivo discurso.

corporacion-municipal-baiona-rende-unha-emotiva-despedida-ana-simonsO salón de plenos abarrotouse este xoves para despedir á concelleira. Veciños, amigos e familiares acompañaron á edil no seu adeus ao Concello despois de presentar o pasado luns no rexistro a súa renuncia a acta de concelleira.

O alcalde, Ángel Rodal, agradeceu a Ana Simóns a súa labor durante os últimos dez anos. “O máis importante é todo o que deixas, todo o traballo desenvolvido durante este anos en favor dos veciños de Baiona, desexamos que teñas moita sorte na túa nova etapa”, sinalou o rexedor despois de entregarlle o escudo do Concello de Baiona.

Pola súa banda, o voceiro do PSdeG-PSOE, Rafael Lores, destacou a “paixón, honestidade e servizo público da concelleira” e sinalou que Ana Simons “sempre amosou unha gran dispoñibilidade para chegar a consensos e dialogar”.

Iago Pereira, voceiro do BNG, afirmou que lembraría a “experiencia positiva” de compartir mesa de traballo coa concelleira e afirmou bromeando que “vanse votar de menos as discusións políticas”. Por último, o edil Silvano Montes, de Esquerda Unida, destacou o “bo talante” de Simons  e brindoulle unha calurosa despedida polo “afecto persoal” que temos.

Ana Simons, ata o día de hoxe concelleira de Urbanismo e Mercados e segunda tenente de alcalde, desenvolveu o seu labor á fronte da área de urbanismo desde 2007, período no que se aprobaron o PXOM (Plan Xeral de Ordenación Municipal), o PEPCHAB (Plan Especial de Protección do Casco Histórico Artístico de Baiona) ou o Plan Especial do Porto de Baiona, ademais de importantes reformas como a de a rúa Areas, a rehabilitación do Arquivo Histórico e Biblioteca Municipal Sancti Spiritus ou a humanización da rúa Carabela Pinta, entre outras actuacións.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies