Os destinos participantes foron avaliados por un grupo de expertos internacionais en turismo, sustentabilidade e medio ambiente tendo en conta un conxunto de indicadores baseados en 15 criterios: coordinación da sustentabilidade, política turística do destino, protección da natureza, a protección da paisaxe, tratamento de residuos, reciclaxe, tratamento de augas residuais, conservación do patrimonio cultural, patrimonio intanxible, protección da xente, participación cidadá, promoción de produtos locais, accesibilidade, prevención da saúde e seguridade.
En canto aos aspectos positivos que se valoraron en Baiona destacan os seguintes:
* A creación do espazo mariño protexido das Rías Baixas, que dota dunha figura de protección ambiental ás augas que rodean Baiona.
* A recuperación de praias e dunas que se comezou polas de Ladeira.
* O modelo de xestión da auga potable a través de Wiz e a súa continuación en Saneplan para a xestión de augas residuais.
* Que o municipio conte con catro praias con Bandeira Azul, e que a totalidade das mesmas estean declaradas “praias sen fume” e conten co Distintivo de Compromiso de Calidade Turística “ SICTED”.
* A accesibilidade das praias e a escola de vela adaptada do Monte Real Club de Yates
* A protección do centro histórico de Baiona.
* O compromiso de Baiona co turismo de calidade, formalizado en INNOVATUR, e na implantación do Sistema Integral de Calidade Turística en Destinos ( SICTED) desde 2004.
*Mellora do transporte público a través do billete único da área metropolitana.
*Participación de Baiona no plan de compostaxe da Deputación de Pontevedra
*Seguridade xeral do destino e a posta en marcha da patrulla ambiental * Hospitalidade da poboación e coidado da cultura local.
ANTECEDENTES: Green Destinations, é unha organización sen ánimo de lucro cuxo sistema de certificación para destinos turísticos implicados en prácticas sustentables estendeuse en apenas tres anos polos cinco continentes. Participan no proxecto, representantes e embaixadores da organización, provenientes dos sectores público, privado, educativo e sen ánimo de lucro.