Baiona consegue por primeira vez na historia que cinco dos seus areais sexan distinguidos co distintivo de ‘Bandeira Azul’.
Esta é a primeira vez que desde o Concello se solicita que sean cinco os areais conten coa devandita cualificación. A bandeira azul ondeará este verán na praia de Santa Marta, Ribeira, Concheira, Barbeira e Frades
A insignia outorgada pola Asociación de Educación Ambiental e do Consumidor (Adeac) obriga a que as praias cumpran unha serie de requisitos aos que se adaptan os areais baioneses. Entre estes aspectos figura a existencia de paneis informativos con educación ambiental, o cumprimento dos estándares da calidade das augas, limpeza e mantemento dos servizos da praia, existencia de socorristas titulados e equipo de primeiros auxilios, accesibilidade, etc.
A bandeira azul tamén ondeará no porto deportivo do Monte Real Club de Yates, a bandeira azul polo coidado ambiental das súas infraestruturas, a calidade das súas augas e a excelencia dos seus servizos náuticos.
O paso inicial para que o organismo atenda as peticións é que a calidade da auga sexa excelente, uns resultados que se obteñen mediante análises quincenais realizadas ao longo do último período estival. Unha vez pasado o primeiro filtro pasan a analizar a accesibilidade, servizos e limpeza dos espazos. Pero non só os areais son candidatos a obter bandeiras azuis, tamén os sendeiros. Os seis quilómetros de percorrido entre a praia da Concheira e o espazo natural da Foz do Miñor foron seleccionados pola flora e fauna existentes no traxecto, o esforzo do Concello por coidar as especies autóctonas e eliminar as invasoras, así como os servizos ao longo do percorrido como contedores e papeleiras, auga potable, botiquín, establecementos de hostalería, miradoiros ou áreas de descanso accesibles para persoas con dificultades de mobilidade.